ഫോണിൽ നോക്കിയിരുന്നു വർഷ അത് പറയുമ്പോൾ അവളുടെ തലയ്ക്കു ഒന്ന് കൊടുക്കാനാണ് മനുവിന് തോന്നിയത്…

റച്ച: Ammu Santhosh

തിരുവോണസദ്യ

“അതേയ് മനു സത്യത്തിൽ പാചകം ഒട്ടും എനിക്ക് അറിയില്ല. അത് ഞാൻ പറഞ്ഞിട്ടുമുണ്ടല്ലോ ഓണസദ്യ ഉണ്ടാക്കാനൊന്നും എനിക്ക് വയ്യ. ഭയങ്കര മെനക്കെട് ആണെന്നെ നമുക്ക് പാർസൽ വാങ്ങാം.. അല്ലെങ്കിലും എന്ത് ഓണം? ”

ഫോണിൽ നോക്കിയിരുന്നു വർഷ അത് പറയുമ്പോൾ അവളുടെ തലയ്ക്കു ഒന്ന് കൊടുക്കാനാണ് മനുവിന് തോന്നിയത്.. എന്ത് ഓണം പോലും.. ഈ സമയത്ത് തൃശൂർ തന്റെ തറവാട്ടിൽ മൂന്നു പായസം കൂട്ടി ഓണസദ്യ ഉണ്ടാക്കുകയാണ്. അമ്മ വിളിച്ചപ്പോൾ പറഞ്ഞു.

“നമുക്ക് ഒന്ന് try ചെയ്യാം യു ട്യൂബിൽ ഒക്കെ ഉണ്ടല്ലോ നമുക്ക് രണ്ടു പേർക്കും കൂടി ചെയ്യാം.. ”

“മനു ഇപ്പോഴും പഴഞ്ചൻ തന്നെ.. എന്റെ മനു ഒരു പാർസൽ വാങ്ങിയ പോരെ? ദേ തിരുവന്തപുരത്തു ഓണസദ്യ പാർസൽ കിട്ടുന്ന ഇഷ്ടം പോലെ സ്ഥലങ്ങൾ ഉണ്ട്. ഞാൻ ദേ ഓർഡർ ചെയ്തു. വീട്ടിലെത്തും സദ്യ ”

മനുവിന്റെ മുഖം ചുവന്നു “ആരോട് ചോദിച്ചിട്ട് നീ ഓർഡർ ചെയ്തു? എനിക്ക് വേണ്ട പാർസൽ സദ്യ ”

“എല്ലാം ഇങ്ങനെ ഭർത്താവിനോട് ചോദിച്ചു ചെയ്യണം എന്നൊന്നും വാശി പിടിക്കേണ്ട മനു. മനുവിന് വേണ്ടെങ്കിൽ ഞാൻ ഒരെണ്ണം കാൻസൽ ചെയ്തേക്കാം.. ”

“Yes ചെയ്യണം.. എനിക്ക് വേണ്ട. ഇച്ചിരി പരിപ്പ് കറി പപ്പടം ഒരു തോരൻ ഇത്തിരി പായസം ഇത് മതി എന്നാലും ഇന്ന് ഒരു ദിവസം ഹോട്ടൽ ഭക്ഷണം വെണ്ട.. ഞാൻ തനിച്ചു ചെയ്തോളാം ”

“Ok ഞാൻ വരില്ല കേട്ടോ..”

“വേണ്ട നീ അതിന്റ മുന്നിൽ കുത്തിയിരിക്ക് ”

മനു യൂട്യൂബിൽ പാചക ചാനലുകൾ നോക്കി.

കുറച്ചു ഒക്കെ അറിയാം. അമ്മ പഠിപ്പിച്ചിട്ടുണ്ട്. അമ്മ പറയും ആരും തോല്പിക്കരുത് നമ്മളെ. ഒരു സ്ഥലത്തും മാറ്റി നിർത്തരുത്. പാചകം ആണും പെണ്ണും അറിഞ്ഞിരിക്കണം.. ഭാര്യ തന്നെ ചെയ്ത് കഴിക്കണം എന്ന് വാശി പിടിക്കരുത് എന്നൊക്കെ. അവൻ അരി കഴുകി അടുപ്പത്തിട്ടു. പരിപ്പ് കൂക്കറിൽ വെച്ചു. തേങ്ങ തിരുമ്മാൻ ആരംഭിച്ചു.

ഉച്ചയായപ്പോൾ പരിപ്പ് പപ്പടം ക്യാബേജ് തോരൻ ചോറ് തയ്യാർ.. അരി പായസത്തിൽ അണ്ടിപ്പരിപ്പും മുന്തിരിങ്ങയും ചേർത്ത് താഴെ വെച്ചിട്ട് അവൻ വർഷയെ വിളിച്ചു

“എടി ഒന്നര മണിയായി വിശക്കുന്നു വാ കഴിക്കാം ”

“എന്റെ മോൻ കഴിച്ചോ എനിക്കുള്ള സദ്യ on the way. അത് മതി ”

അവളുടെ മുഖത്ത് നിറഞ്ഞു നിന്ന അഹങ്കാരം കണ്ടപ്പോൾ മനുവിന് ദേഷ്യം വന്നെങ്കിൽ കൂടി അവൻ അത് അടക്കി. തിരുവോണം ആണ്.. പോട്ടെ വഴക്കുണ്ടാക്കണ്ട.

ഊണ് കഴിഞ്ഞു എഴുന്നേറ്റപ്പോൾ ഗേറ്റിൽ ആരോ നിൽക്കുന്ന പോലെ കണ്ടു അവൻ അങ്ങോട്ട് ചെന്നു ഒരു അമ്മയും കുഞ്ഞും

“വിശക്കുന്നു സാറെ എന്തെങ്കിലും.. ” ആ കുഞ്ഞിന്റെ മുഖം കണ്ടപ്പോൾ അവന്റെ ഉള്ളു ഒന്ന് പിടഞ്ഞു

ബാക്കി വന്ന ചോറും കറികളും പൊതിഞ്ഞു അവർക്ക് കൊടുക്കുമ്പോൾ വീണ്ടും അമ്മയെ ഓർമ്മ വന്നു. തിരുവോണനാളിൽ അമ്മ കൊടുക്കാറുള്ള പൊതിച്ചോറുകൾ.. അന്ന് ഊണിനു മുന്നേ ഇറങ്ങും അമ്മ പൊതിച്ചോറുകളുമായി തെരുവിൽ ഉള്ളവർക്ക് കൊടുത്തിട്ടേ അമ്മ ഉണ്ണുകയുള്ളു..

“നിന്റെ സദ്യ വന്നില്ലേ? ”

മൂന്നു മണി ആയിട്ടും വർഷ അങ്ങനെ ഇരിക്കുന്നത് കണ്ടു അവൻ ചോദിച്ചു

“അവർ ഫോൺ എടുക്കുന്നില്ല അവിടെ വരെ പോയാലോ? ”

“നീ പോയിട്ടു വാ എനിക്ക് ഒന്ന് ഉറങ്ങണം ”

അവന് പൊട്ടിച്ചിരിക്കാൻ തോന്നി വേണമെടി വേണം നീ ഇന്ന് പട്ടിണി കിടക്ക്.

നാലു മണി ആയപ്പോൾ വർഷ തിരിച്ചു വന്നു.. കയ്യിൽ ബ്രെഡും പഴവും

“സദ്യ തീർന്നു ”

അവൻ പൊട്ടിച്ചിരിച്ചു

“എടി.. അഹങ്കാരം കുറയ്ക്കണം ആദ്യം.. രണ്ടു കറി മതി.പക്ഷെ തിരുവോണത്തിന് അവനവന്റെ വീട്ടിൽ ഉണ്ടാക്കാൻ ഒരു മനസ്സ് വേണം. ആരുമില്ലാത്ത അന്യ നാട്ടിൽ നിന്നു വന്നു താമസിക്കുന്ന ആൾക്കാർ ആണെങ്കിൽ പോട്ടെ.. ഇത് അതാണോ. മടി ഒന്നും വയ്യ. പെണ്ണുങ്ങൾ കുക്കിംഗ്‌ ചാനെൽ തുടങ്ങി സമ്പാദിക്കുന്ന കാലമാണ് ..അവൾക്ക് പാചകം പുച്ഛം ആണ് പോലും.. ”

വർഷ മിണ്ടാതെ നിന്നു

“ബ്രെഡ് നോക്കട്ടെ ഫ്രഷ് ആണോ? ”

അവൻ അവളുടെ കയ്യിലെ ബ്രെഡ്‌ വാങ്ങി നോക്കി. എക്സ്പയറി ഡേറ്റ് കഴിഞ്ഞത്.

“ബെസ്റ്റ് ഇത് കഴിച്ചാൽ നീ തട്ടിപ്പോകും.. പഴം കഴിച്ചോ.അതാ നല്ലത്. പോയി കുറച്ചു വെള്ളം കൂടി കുടിച്ചോ “അവനത് തിരിച്ചു കൊടുത്തു.

“സോറി മനു.. മനു ഉണ്ടാക്കിയ എല്ലാം തീർന്നോ.. “അവളുടെ അഹങ്കാരം ഒക്കെ പോയി താഴ്ന്ന ശബ്ദം.

“ആ തീർന്നു.. ഭക്ഷണം ദൈവം പോലെ കാണുന്ന ഒരു അമ്മയ്ക്കും കുഞ്ഞിനും കൊടുത്തു.. നീ ഇന്ന് പട്ടിണി കിടക്ക്.. ”

വർഷ തല കുനിച്ചു അകത്തേക്ക് പോയി.

മനുവിന് ഒരു ദയയും തോന്നിയില്ല.

ഇത് ഒരു പാഠമാകട്ടെ ആരോഗ്യം ഉള്ളവർക്ക് സാഹചര്യം ഉള്ളവർക്ക് ഓണത്തിന് എങ്കിലും ചോറും കറിയും വീട്ടിൽ ഉണ്ടാക്കാൻ മടി കാണിക്കുന്നവർക്ക് പാഠമാകട്ടെ..

ഒരു പാട് പേർക്ക് തിരുവോണം ഇങ്ങനെ ആയിപ്പോയിട്ടുണ്ട്..

അടുത്ത വർഷം സ്വന്തം കൈ കൊണ്ട് ഉണ്ടാക്കിക്കൊള്ളും അവരൊക്കെ..

മനു ഒരു മൂളിപ്പാട്ടും പാടി ടീവി ഓൺ ചെയ്തു

റച്ച: Ammu Santhosh

Leave a Reply

Your email address will not be published. Required fields are marked *